Category Archives: By die waters

Water wat wink

Oktober, 2013.

Kameelperde knibbel langtand aan dor herfsblare, smagtend na eerste sappige bloeisels.

TYDENS UITERSTE DROOGTE VERTOON DIERE DIESELFDE KLEUR AS DIE BLEEK VELD (5 Okt 15 - 007)
WANNEER EERSTE REëNS KOPPIG WEGBLY SMELT DIEREKLEURE SAAM DIE BLEEK VELD.  (5 Okt 13, 007)

Rooistof klou aan buffelsweet terwyl die savannah haar grassade diep in die skoot koester.

Selfs die koning laat sy goue kroon onrustig sluimer. Saam die salige hitte wag sy gemoed op die dreun van die eerste donder. ‘n Belofte wat die groot dors kan les.

Leeu in hitte

Die renoster proe die bitter alg van stinkende modderpoele …

Renoster drink

voordat hy ‘n modderbad van die maerte daarvan maak.

Renoster modderbad

Die water kom!

Wanneer die hemel haar vensters oopgooi stoot stortreëns kabbelende voortjies na damme en riviere.

Kameelperd drink

Die kameelperd buig makliker terwyl ‘n saalbek-ooievaar hap-hap na die lewe in die water.

Buffels klouter na benede, terwyl waterlelies se spruite ontkiem en biesies met denamiet in sade spog.

Buffels in dam

Die saalbek se hap-hap vorm waterrimpels  wat al wyer-en-wyer hoepels kabbel.

Voël in water

Olifante stoom en rol en spuit koel water-strooitjies na mekaar.

Olifante bad

Buffels skep water met hul holtes en hoor die klotsing van bruisende golfies.

Buffels rol in water

Nou wonder ek … waarom het elke dam ‘n dooie boom? is dit juis van te veel water of die droogte?

Boom droog in water
SEEKOEIE ONDER ‘N DROë BOOM DROOM VAN SEISOENE WAARIN HULLE IN DIEP WATERS KAN WEGSINK.

Geen mens of dier kan sonder die water van die lewe nie.

(Hierdie stukkie is ingeskryf vir Scrappy2 se uitdaging oor WATER/BADTYD)

Advertisements

By die waters

Wanneer ons rondrits in die wildernis en iemand sou vra; “Waarheen gaan ons … wat wil julle graag sien?” antwoord ek gewoonlik: “Kom ons gaan sit by die rivier of op die dam se wal – by die waters.”

 Natuurlik is almal nie beindruk met my voorstel nie. Want die manne like mos van 4×4-ploeg of jaag agter Die Groot Vyf aan. (Sug) Agterna val jy rooiboud uit die Jeep en karplaks op die bed neer. Maar die hartseerste nog: geen fotos.

 Nee, nee, nee. By die waters is rus en saligheid en water-geveerdes en dorstige diere en sundowners en … as dit nou moet, die Groot Vyf ook!

Daarom sal ek en Blommie vroeg-vroeg uitsluip – terwyl die mis nog  rookagtig wuifel oor koel waters – en  ons warm slaapplekkies agterlaat om rivier se kant toe te mik. 

(Meeste fotos: Blommie Jul 2013) 

VROEGOGGEND LEWE BY DIE WATERS. Reusereier (Ardea goliath) waterdikkoppies en nylkrokodil
VROEGOGGEND LEWE BY DIE WATERS.  Reusereier (Ardea goliath) waterdikkoppies (voëls) en nylkrokodil

As jou dag so geseënd afskop kuier jy sommer gou-gou water-lekker.

DIS ONS BEURT. Sebrafamilie drink dorstig terwyl hings aan linkerkant  vir roofdiere dophou
DIS ONS BEURT.  Sebrafamilie drink dorstig terwyl hings aan linkerkant vir roofdiere dophou

Dis interessant om te sien hoe diere beurte maak by die drinkplek. Hul respekteer rystaan.

BRRR ... DIS NAT. Skukuza bobbejane vang 'n namiddag swem in die Sabie rivier
BRRR … DIS NAT!  Skukuza bobbejane vang ‘n namiddag swem in die Sabie rivier

By die waters kan soms die mooiste dinge gebeur – soos hierdie troppie bo wat in die salige hitte besluit het om af te koel.  Soos kinders het hul mekaar se koppe onder die water gedruk en het dit soms rof en skreeuend gegaan. Die kleineres is afgeknou en sommige het besluit dis veiliger op die droë rotse.  

"SKUIF OP KROK - EK WIL UITKLIM!" 'n Seekoei soek pad tussen wriemelende krokkedille.
SKUIF OP KROK – EK WIL UITKLIM!”  ‘n Seekoei soek pad tussen wriemelende krokkedille.

Voor die eerste somerreëns raak watervlakke laag en populasie oorvol. Dan wonder jy wie is baas of wie is klaas? 

"DAGSê!"  Aitsa - wie kom slurpswaaiend met 'n groot dors hier aangetrippel?
“DAGSê!”  Aitsa – wie kom slurpswaaiend met ‘n groot dors hier aangetrippel?

Ja,  olifante kan nogal fluister-trippel op sagte kussingpote en kan onverwags agter jou voertuig verskyn as jou aandag op die dam is. ‘n Beter idee is om te  ‘ruik’ of olifante naby is of die voertuig af te skakel en te luister waar die takke breek.  Om te sien hoe olifante baljaar in die water is natuurlik aanskoulik en ‘n glimlag-plesier. Deur hul strootjies spuit hulle mekaar nat en kan die logge liggame soms heeltemal onder die water verdwyn soos hul snorkel. 

"Grote griet - die water is la.a.a.ag"  Skukuza kameelperd met bosluisvoëls op die rug
“GROTE GRIET –  DIE WATER IS  La.a.a.ag!”  Girivana dam  kameelperd  met bosluisvoëls op die rug langs die  S12  (2013)

Om ‘n kameelperd af te neem wat water drink vra geduld. Hulle sal uiters versigtig nader skuifel, lank rondloer en wonder hoe veilig dit is, dan besluitloos om die dam beweeg vir die regte drinkplekkie, uiteindelik bene oopspalk om strek-strek af te sak, net om haastig daarteen te besluit en orent te ruk, terug te draai en weer van voor te begin. En dan, uiteindelik, tyd vir kiek!

 

"Mmmm - ek dink julle het genoeg gekiek en gestaar ..." Nsemane dam seekoei langs die H7
“PSSST! – KORREL VIR DIE BORRELS .  Nsemane dam seekoei langs die H7

Soms in die Krugerwildtuin as die hitte oor 41grade stoot, wens jy  om saam die seekoeie in koel waters borrels te mag blaas. Moet dit egter nooit waag nie – seekoeie is baie gevaarlik en het menig mens al gedood.  

"Laaste krappie gaps voor die son goud word"  Lace panic reier
“LAASTE KRAPPIE GAPS VOOR DIE SON GOUD WORD!”   Lake Panic reier

Die beste tyd by die waters is natuurlik wanneer die son gaan slaap. Dan kry die nagdiere lewe en paddas begin met hul kooroefening. Die atmosfeer vul met goud en selfs die seekoeie klim uit die dam om heelnag om jou tent te kom nurk. 

So ‘n sielvolle dag laat jou vervuld en soet slaap, sonder rooiboude of ‘n slaappil …